شاهه محمد گاڏهي

شاهه محمد گاڏهي: ليکڪ ۽ لائبررين، شاهه محمد ولد محمد بچل گاڏهي، 4 مئي 1939ع تي لاڙڪاڻي ضلعي جي ڳوٺ مڏ باهوءَ ۾ ڄائو. پرائمريءَ کان مڊل تائين ڳوٺ ۾ تعليم ورتائين، بعد ۾ گورنمنٽ هاءِ اسڪول لاڙڪاڻي مان مئٽرڪ جو امتحان ڏنائين. هاءِ اسڪول جي تعليم کان يونيورسٽيءَ ۾ ملازمت تائين سندس والد جو دوست، تعليمدان ۽ سماجي اڳواڻ الهڏتو کيڙو سندس مددگار رهيو. شاهه محمد گاڏهيءَ لائبريري سائنس ۾ گريجوئيٽ ۽ پوسٽ گريجوئيٽ ڊپلوما 1967ع ڌاري ڪئي، گڏوگڏ بي. اي ڪرڻ بعد لائبرري سائنس ۾ ماسٽرس جي ڊگري 1974ع ۾ حاصل ڪيائين ۽ ماسٽرس جي ٿيسز ۾’حيدرآباد شهر جي يونين ڪميٽين جون لائبرريون‘ عنوان هيٺ تحقيقي مقالو لکيائين. 1978ع ۾ ايم. اي سنڌيءَ جي ڊگري ورتائين.
شاهه محمد گاڏهيءَ 1958ع کان 1970ع تائين سنڌ يونيورسٽيءَ ڄامشوري جي علامه آءِ آءِ قاضي، مرڪزي لائبرريءَ ۾ خدمتون سرانجام ڏنيون، جنهن بعد تعليم کاتي سنڌ ۾ لائبررين مقرر ٿيو ۽ 1999ع ۾ رٽائر ڪيائين. شاهه محمد مختلف لائبريرين ۽ سماجي ۽ علمي تنظيمن جو ميمبر به رهيو. 1996ع ۾ ’سنڌ لائبرري ايسوسيئيشن‘ جو بنياد وڌائين، جنهن جو صدر ٿيو. 2009ع ۾ ڪوثر پبليڪيشن جو بنياد وڌائين ۽ ڪجهه ڪتاب به ڇپايائين.شاهه محمد گاڏهيءَ جي ڇپيل ڪتابن ۾: (1) لائبريري سائنس جي تعليم: ڀاڱو پهريون (1984ع)، (2) ڪتابخانن جو انتظام (ترجمو: 1985ع)، (3) لائبرري سائنس جي تعليم (ڀاڱو ٻيو: 1987ع)، (4) تقرير جو فن (ترجمو: 1988ع)، (5) ڊاڪٽر محمد علي قاضي ۽ لائبررين شپ (1990ع)، (6) محبوب سروري (نثر نويس) (1992ع)، (7) ڊاڪٽر محمد علي قاضي تحريرن جي آئيني ۾ (ترتيب: 1995ع)، (8) سيرت ڪوئيز (1995ع)، (9) وڏن ماڻهن جو عشق (ترجمو: 1996ع)، (10) عڪس جمال مصطفيٰ صلعم (1997ع)، (11) سنڌيءَ ۾ لائبرري سائنس جي ببليوگرافي (1999ع)، (12) Dictionary of Library Science (English Sindhi & urdu) 2000ع، (13) مسلمان قبيلن جو مختصر تاريخي ۽ روايتي خاڪو (ترجمو: 2004ع)، (14) تاريخ ڪڇ ۽ مڪران (ترجمو: 2006ع)، (15) حيات قلندر رح (ترجمو: 1986ع) ۽ (16) ڪلام محبوب سروري (ترتيب: 1992ع) شامل آهن.
اڄڪلهه مختلف اخبارن ۾ مخزنن ۾ مضمون لکندو رهي ٿو.

داخلا ۾ استعمال ٿيل تاريخون

1939.05.04  عيسوي

ليکڪ ۽ لائبررين، شاهه محمد ولد محمد بچل گاڏهي، 4 مئي 1939ع تي لاڙڪاڻي ضلعي جي ڳوٺ مڏ باهوءَ ۾ ڄائو.

اديب - ڀاڱي جون ٻِيون داخلائون